معلومات هامة اوي للمتقدمين لوظائف السيلز .

السؤال الاول مطلوب الاجابه عن اربع حاجات فقط



Could you Introduce your self in English? (just mention: Name, Age, Faculty, Experience)



و ده طبعا عارفين الاجابه النموذجيه بتاعته



=========

السؤال التاني

=========



طلب السؤال من كل واحد انه يبيع اي حاجه هو بيختارها و كل واحد كانت بيختارله حاجه مختلفةانا ههتم هنا يا جماعه اني اقولكوا تركزوا على ايه اكتر من الاجابات النموذجيه بالانجليزي



===================



واحد طلبت منه انه يبيعلها شنطة بنت كانت محطوطه قدامها فقالها ان دي شنطه جلد و فيها جيوب ، سألته ايه نوع الجلد، جاوب و قال جلد ((((( سكاي ))))) و هنا دي غلطه كبيرة جداااااا انت معقول هتبيع شنطة حريمي لبنت تقولها جلد سكاي؟؟؟؟؟؟؟ حتى لو كان كده يا جماعه في حاجه مهمة جدااااااااا في سؤال بيعلي اي حاجه ده ركزوا في الاسئلة و هقولكوا هي ايه في الاخرالاجابه الصح على سؤال زي كده انه كان يقول ده جلد طبيعي

natural leather



، الشنطه دي حجمها مثالي ممكن تحطي فيها كل اغراضك ، و عندنا كل الالوان منها حضرتك تحبي لون معين؟و كمان الموديل ده مش موجود في ولا شركة منافسه لينا ده تصميم خاص جدا للشركة بتاعتنا و اللي عاملنا التصميم ده شركة كوالالامبوريه هنديه ماليزيه اسكندرانيه (لو ما لقيتش كلام تقوله بقى) الشنطه دي كاتمه للصوت و للريحه يعني ممكن تخبي فيها قطه و ماحدش يقدر يسمعلها صوت ، و كمان دي فيها عداد يقولك انتي مشيتي كام متر انهارده خدي الاخيره بقى عليها خصم خاص جدا عرض ليوم واحد اشتري شنطة و خدي 10 هديه كل كلام البيع ده انت بتقوله و انت مبتسم من شعر راسك لضوافر رجليك ابتسم ابتسم ابتسم ابتسم بشكل ما ينرفزش الزبون لكن تكون ابتسامه من قلبك فعلا ليه و استخدم ال

body contanct

حركات ايديك و جسمك و و تعبيرات وشك بشكل يخطف الزبون



نكمل انا اتسألت اني ابيع موبايل نوكيا 1200 و كلنا نعرف ايه هو النوكيا ال 1200 طبعاالاول رحبت بيها في شركتنا و قولتلها ان وقتي كله تحت امرها لغاية ما يستقر رأيها انهارده على افضل موبايل ممكن تشتريه في حياتها بالنسبه للموبايل ده اهم ميزه فيه يا مدام انه فيه كاميرتين ، كاميرا في الخلف هنا تقدري تصوري بيها اي حاجه ، تقدري تصوري بيها صحابك ، مناظر طبيعيه ، مواقف نادره ، و كاميرا قدام هنا تقدري تصوري بيها نفسك و تستخدميها بدل المرايه في تظبيط المكياج و بدون ماحد ياخد باله من اللي هتكوني قاعده معاهم و تقدري تصوري نفسك انتي و صحابك بدون ما تحتاجي لشخص غريب تضطروا ليه عشان يصوركوا و ممكن يصوركوا و ياخد الموبايل و يجري الموبايل ده نازل معاه 24 وش هديه يعني هيكون معاكي دايما موبايل لايق على اللبس بتاعك ، لايق على لون عربيتك ، و معاه 50 قطعه اكسسوار هديه تقدري تعلقي منهم القطعه اللي تتناسب مع مودك كل يوم فسألتني الموبايل ده بكام قولتلها الموبايل ده ب 1000 جنيه بس لحسن الحظ ان انهارده في One day offer 50% و تقدر تاخد الموبايل ب 500 جنيه بس فقالتلي لا بردو كتير عليا 500 جنيه قولتلها لا بس مش كتير ع الموبايل ده المميزات اللي فيه مش موجوده في احسن منافس ليه في السوق و اللي سعره 2000 جنيه يعني انتي كده موفره 1500 جنيه + معاكي مميزات مش موجوده في ولا موبايل تاني في الفئه ديو بعدين ده حجمه صغير جداُ كنت ممكن اكمل معاها بس بصراحه هي وقفتني قالتلي كفايه كده لان الناس كلها كانت عماله تضحك م اللي انا بقوله و من طريقتي في بيع الموبايل كنا جروب حوالي 10 في الاوضه طلبت من واحد بعدي يبيعلها قلم و للأسف ما عرفش يقول كلمه واحده هي بقت متدايقه لانها شخصية محترمه جدا و عايزانا كلنا نوصل للاختبار الاخير مش عايزه حد يطلع من الاختبار بتاعها فكانت بتساعد اللي مش عارف فساعدته شوية في بيع القلم ازاي بس باعت الهوا اللي في الاوضه بطريقه مسخره الاوضه اللي احنا فيها دي مافيش زيها في العالم بسبب الهوا اللي جواها ، احنا حاطين جهاز هنا في اخر الاوضه بيمتص كل الغازات السامه و ثاني اكسيد الكربون ، و الشباك ده محطوط في مكان بدراسه عاليه جدا بحيث انه يدخل الهوا للاوضه بمعدلات تتناسب مع معدل التنفس الطبيعي لاي شخص ، و زارعين شجره هنا في الجنينه قدام الشباك على طول جايبينها من اسطنبول و اصول بزورها من الهند الشجره دي بنرويها بطريقه معينه و مثاليه بحيث تطلع اكسجين و فيتامينات يعني انت قاعد في الاوضه هنا اضمن انك بتاخد كل الفيتامينات و الاكسجين اللي جسمك محتاجله طول اليوم



خليني اسألكوا سؤال: حد فيكوا عمره فكر يبيع الهوا !!!!!!!!!!!!!!



الحاجه اللي قلتلكوا عليها هقولهالكوا في الاخر هي ان انت في انترفيو مبيعات، يعني مش بجد، افتكروا ماما كانت بتقولنا ايه زمان ع البوس اللي في الافلام "ده مش بجد دول بيبقوا حاطين ازاز بينهم عشان التمثيل بس"يا جماعه اعتبروا نفسكوا قدام كاميرا و بتمثلوا انكوا بتبيعوا يعني ممكن يبقى في ايدك قلم بريما و تقول ان ده قلم دهب و الحبر اللي فيه ما بيخلصش مدى الحياه و عليه ضمان 101 سنه ايه المشكلة يعني ، اللي بيعملك الانترفيو مش عايز يختبر مدى مصداقيتك و ادبك هو عايز يعرف انت هتقدر تقنع الزبون انه يشتري اللي في ايديك ده و لا لا يعني لازم تتخيل و تعيش الموقف بجد انك ،



افتكر احمد حلمي في صايع بحر : 2.5 2.5 2.5 ، اعتبر نفسك للحظه مصدر رزقك الوحيد في الدنيا هو الحاجه اللي في ايديك دي و بتبيعها عشان الفلوس بتاعتها دي هي اللي انت عايش عليها يعني لازم تبيع ما ينفعش زبون يمشي من غير ما تبيع



=========

الانترفيو الثالث

=========







للاسف المهم كانوا بيسألوا بشكل عشوائي و كنا جروب 5 اللي قاعدين معاهم خلى واحد مننا يقلع جاكت البدله بتاعه و يبيعه خلاص عرفنا ممكن تبيع جاكت بدله ازاي بمبدأ بقى انك هتبيع الهواء الولد ده جاوب كويس فسأله الراجل الهندي ,

و الخطوه ايه اللي بعد كده انا خلاص هشتري ، انت كبياع هتعمل ايه و ليك انت فكر شوية قبل ما تقرا الرد عشان انا بصراحه ما كنتش اعرف ايه السؤال الغريب ده عدى على الكل واحد واحد ايه رأيه انا عن نفسي قلتله هقوله

congratulation

عشان اخد قرار سليم و ان البدله دي احنا عاملين منها عدد مبيعات خيالي من ساعة ما نزلت مقارنة ببقيت الموديلات عشان اخليه يدفع و هو متطمن بس اخويا (كان معايا في الجروب ده) قال اجابه احسن مني بكتير قال هقوله طب يا فندم مش هتشتري قميص او محتاج كرافته الراجل الهندي بقى هيزغرط الولد قعد يحاول يقطع الكلام و يقوله انا فهمت انك تقصد انك اصلا كنت بتشتري بدله كامله بقميصها و كرافتتها و كل حاجه (بيحاول يشتغله يعني عشان هندي) و كان مخلي الراجل مش عارف يتكلم فالهندي قاله جمله جميله اوي: خد بالك ان انا دلوقتي عميل بالنسبالك يعني ما ينفعش ابقى انا بتكلم و انت بتقاطعني ابدا انت كده هتخسر العميل لما سأل اخويا و بص في السي في بتاعه فعشان قرا انه كان مدير لفترة فقاله اعتبر نفسك مدير فرع و دخلت دلوقتي من الباب ممكن تعمل ايه ؟



فاخويا قام و دخل من باب الاوضه و بيكلم نفسه: انا محتاج اعيد تنظيم البضاعه في الرفوف اللي هنا، محتاجين اضاءة مختلفة على الرفوف دي عشان المنتج يظهر اكتر، المنتج ده محتاجين نغير مكانه يكون في مكان ظاهر عن كده عشان بقاله كام يوم مش بيتباع



ممكن العميل مش بيشوفه كويس هنا عشان حجمه بالنسبه لحجم المكان ده، و قاله هتأكد ان مافيش اي تراب على اي بضاعه ، و ان طفاية الحريق معمول عليها المتابعه انها سليمه الراجل الهندي ما خلاهوش يكمل قاله كفايه كده و لما وصل ليا خلاني ابيعله كبايه ازاز من ابرز الحاجات اللي قولتهاله ان الكبايه دي مافيش زيها في اي مكان تاني خامتها مميزه جدا مصنوعه بتقنيات عاليه و لو رميناها ع الارض كده



(و مثلت اني برميها ع الارض بجد) مش هتتكسر ، كبايه شفافه عشان تعرف ايه اللي جواها و باقي قد ايه و انت بتشرب ، و في عليها عرض خاص جدا انهارده بس اشتري 3 و خد واحده هديه من ضمن كلام الراجل الهندي لواحد من الجروب قاله خلي بالك انا ممكن اطلب منك تبيعلي ورقه مكتوب فيها مش حتى بيضا ممكن استخدمها



و عرفت ان في واحد اترفض عشان ما عرفش يبيع موزة يعني يا جماعه الشباب اللي يروح يعمل اختبار سيلز توقع انك ممكن يتطلب منك تبيع اي حاجه و فعلا فعلا فعلا اصعب حاجه في الدنيا ممكن تبيعها هي الهوا ، كتير اوي سمعنا جملة "انا ببيع الهوا في ازايز ، و ببيع الميه في حارة السقايين" بس عمرنا ما عرفنا ازاي ،



و اديني قولتلكوا ممكن تبيعوا الهوا ازاي في انترفيو



بس يعني مش بجد يبقى اي حاجه تتطلب منك تبيعها ,,,,,,,,,,,,, هتبيع ،



و بالمناسبه اكتر درجه ممكن تاخدها في تقديم نفسك هتاخدها لو بتتكلم مع الشخص اللي قدامك على انك بضاعه و بتظهر افضل مافيها حتى انا من اميز الجمل اللي بقولها في انترفيو في الاخر : ان اهم نقطه في المعلومات الشخصية عندي اني واخد اعفاء نهائي من الجيش مش مجرد اني بقول : بالنسبة للخدمه العسكرية أنا واخد اعفاء نهائيا



===========

اتمنى اكون افدتكم ... و بالتوفيق