الأحد، 8 يناير، 2012

مقابلات حازم حسن لبنك فيصل من الالف للياء

مقابلات حازم حسن لبنك فيصل من الالف للياء

السلام عليكم ورحمة الله وبركاته




امتحان وانترفيو حازم حسن تبع بنك فيصل

وقولت هاعمل موضوع للناس كلها علشان لسه باقي 3 فروع اللي هما القاهرة والاسكندرية وقنا وربنا يوفق الجميع


هنبدا من لما بيتصلوا بيك ويقولولك علي الميعاد والساعة والعنوان.

طبعا حازم حسن موجود عند الكيلو 22 علي طريق مصر اسكندرية الصحراوي جنب الفرع الرئيسي لبنك عوده قبل القرية الذكية ب 6 كيلو تقريبا. هنروح ازاي؟

فيه طريقتين

الاولي من ناحية الرماية هتاخد اي حاجة توديك للرماية وهناك هتسال علي موقف الــ 28 او اسكندرية لان الاتنين جنب بعض مفيش دقيقة بين الاتنين بالظبط هتروح وتقولهم فين عربيات القرية الذكية ؟ هيشاورولك عليها هتسال السواق وتقوله عايز انزل عند حازم حسن ؟
هتركب معاه وهتدفع جنيه وربع تقريبا . وهتاخد بتاع تلت ساعة من الموقف لحد ما ينزلك عن حازم حسن ولو اتاخرت هتاخد بالكتير اووووووي نص ساعة وانت راكب معاه هتلاحظ حازم حسن هتلاقيه علي ايدك الشمال مبني كبيييييييييير وعليه اسم حازم حسن وكمان جنبه بنك عوده بردوا واضح وباين. هينزلك قصاده هتعدي للناحية التانية وتدخل هناك عند الاستعلامات.


الطريقة التانيه

انت ممكن تركب من رمسيس
لو اخدت المترو ونزلت محطة الشهداء ( اللي هي رمسيس ) وتطلع تسال علي عربيات اكتوبر هيقولوك علي مكان الموقف

هتروح هناك وتقول للراجل انك عايز تنزل علي المحور عند السلم اللي يوديك للقرية الذكية . شويتين وهينزلك علي المحور وهتلاقي سلم جنبك ينزلك لتحت . انزل وهتلاقي عربيات كتير واقفة تحت السلم هتقولهم انك عايز تروح عند حازم حسن . بالظبط يادوب بتاع 10 دقائق بالكتير اووووووي وهتكون هناك وتدخل للاستعلامات.


انت بتدخل حازم حسن وبتروح للاستعلامات وهيقولك تنزل تحت الدور الارضي اللي فيه قاعات التدريب

هتقعد هناك وهتلاقي اتينين من الموظفين يدخلوا عليك ومعاهم الورق والامتحانات وورقة بالاسماء المفروض تعمل الامتحان

انت بتشوف اسمك وتمضي قصاده وتعرف اسمك رقم كام في الورقة ديه لان الرقم ده هتكتبه علي ورقة الاجابة بتاعت الامتحان

وكمان هتلاقي المكاتب اللي هتقعد عليها مترقمة وبردوا هتقعد علي نفس رقمك اللي شوفته واللي هتكتبه علي ورقة الاجابة

بعد كده هيقولوك الامتحان عبارة عن 3 اجزاء


logic test

math test

english test


انا هاقول علي الامتحان اللي جالنا بس في الاول كنت عايز اعرف حاجة:
حصلت حاجات غريبة يوم امتحان فرع المنيا بحازم حسن

فيه ناس من الفيوم جات وامتحنت وعملت مقابلات مع العلم انه مفيش حد اتصل بيهم وهما جايين من نفسهم

تاني حاجة بردوا فيه ناس من المنيا جات من نفسها من غير ما اي حد يتصل بيهم وبردوا امتحنوا وعملوا مقابلات

انا مش بقول كده اعتراضا علي عليهم . كل واحد ليه نصيب هياخده ومحدش هياخد اكتر من نصيبه واللي مكتوب ليه الوظيفة هياخدها غصبن عن اي حد طالما مكتوبه ليه وربنا رايد ليه بالخير بس انا بقول كده لان اكيد زمايلي اللي مجوش الامتحان علشان محدش كلمهم زعلوا لما عرفوا انه فيه ناس كتيييييييييرة راحت وامتحنت من غير ما حد يكلمهم. هو المفروض ان حازم حسن اتصلوا بحوالي 30 واحد من المنيا لكن الناس اللي عملت الامتحان والمقابلة كانوا 50 واحد تقريبا . طبعا ال20 دول الناس اللي راحت من نفسها. احنا سالنا هناك ان الفرع محتاج قد ايه ؟ قالوا حاولي 5 تقريبا يعني بمعدل كل 10 افراد هياخدوا فرد . ربنا يسهل ويوفق الجميع ويكتب الخير للناس كلها ويرزقنا خيرا ان شاء الله


بالنسبة للامتحان

هتبدا باللوجك تيست

وده عبارة عن اسلة الاي كيو واللي هي اسئلة التسلسل (sequence )

هيجبلك 50 سؤال

السؤال بيكون عبارة عن 4 رسومات وفيه رسمة ناقصة انت بتشوف تسلسل الــ 3 رسومات التانية وبتختار الرسمة الرابعة اللي ناقصة

الامتحان ده هيخلص في 30 دقيقة بالظبط

بعد كده انت براحتك تمتحن امتحان الانجلش او الماس اللي يريحك انت وكل امتحان فيهم بردوا نص ساعة

بالنسبة لامتحان الماس تيست

ده عبارة عن اسئلة جمع وطرح وضرب وقسمة وطبعا ممنوع استخدام الموبايل او الة حاسبه

انا فاكر شوية اسئلة هاقولهم

مثال للقسمه اقسم الرقم ده


7932علي 37.32 الناتج يساوي =
هيقولك مثال للجمع بس مش متذكر الارقام لكن نفس الفكره يعني

123
+1234
+12345
ــــــــــــــ

الطرح نفس الفكره



الضرب بيكون رقمين في رقمين

مثال


56*34
( انا بقول ارقام للمثال فقط لكن مش هي اللي جات . لكن متهيالي اللي جات المثال بتاع القسمه بنفس الارقام)

بردوا فيه اسئلة للجمع والضرب والطرح عبارة عن كسور يعني:

اجمع

5 7 2
ــــــــ + ____ + ـــــــــ =
6 3 3


الطرح والضرب بردو نفس الفكره

وفيه سؤال بيجيبلك مستطيل وبيقولك علي طوله وعرضه وبيقولك هات مساحته

السؤال التاني بيجبلك نفس المستطيل بس بيكون فيه مثلث من بره ويقولك هات مساحة الشكل كله

وفيه سؤال بيقولك اختصر لابسط صورة

ab^3
ــــــــــــــــ

ba^2
وفيه سؤال عن تسلسل لارقام يعني جايبلك كذا رقم وفيه رقم ناقص يقولك كام الرقم ده مثال


1 3 7 13 ..... 31 الرقم الناقص كام ؟ الاجابة هتكون 21 لاننا بنزود 2 ثم 4 ثم 6 ثم 8 ثم 10

فيه سؤال بيجبلك مثلث قائم الزاوية وبيقولك ان زوايا المثلث هي زاوية a وزاوية b وزاوية c وبيقولك ان اطوال الاضلاع هي a ، b ، c

وبيطلب منك تجيب sin a ؟ عايز منك جا a متهيالي هيتساوي طول الضلع المقابل علي طول الضلع المجاور والله اعلم انا مش متاكد بالظبط


بس هي ديه الاسئلة اللي جات في امتحان الماس . امتحان الرياضيات مياخدش ربع ساعة بس حاول تعرف الاسئلة الغريبة اللي قولت عليها

بالنسبة لامتحان الانجلش هو امتحان سهل وكويس

عبارة عن 10 اسئلة اختيارات

وحوالي 12 كلمة ترجمة من عربي لانجلش

وسؤال انت بتكتب زي برجراف كده .

بالنسبة لل10 اختيارات دول اغلبهم بيعتمد علي الكلمات مش القواعد وحاجات سهلة باذن الله

اما الكلمات اللي هترجمهم من العربي للانجلش هاقولكم اللي فاكره

السنة المالية

الاستثمار

القسط الشهري

الدستور

البرنامج الزمني

التضخم

معلش مش متذكر الباقي

بالنسبة لسؤال الكتابة

بيقول عرف نفسك في حدود 10 سطور ولا يزيدوا عنها وبيقولك علي الحاجات اللي مفروض تعرف نفسك او تكتب فيها

يعني بيقولك لما تكت هتذكر الحاجات ديه

التعليم بتاعك

وظيفة الوالد

مهاراتك

نشاطاتك واوقات الفراغ بتاعك

فيه حاجتين تانين بس مش متذكرهم


وبكده الامتحان يكون خلص . علي فكره امتحان الانجلش ياخد معاك ربع ساعة

هاقولكم علي كام ملحوظه كده :

المفروض انك لما بتخلص امتحان اللوجك هما بيلموا ورق الاجابة من الناس كلها لكن لو انت لسه مخلصتش ممكن تقولهم انك لسه مخلصتش وتخلي ورق الاجابة معاك ليه بقي؟

لانك ان شاء الله هاتخلص امتحان الانجلش والرياضة في اقل من مدتهم فتقدر بقي تستغل الوقت الباقي في انك تكمل الاشياء الناقصة معاك او تراجع علي حلك

وان شاء الله ربنا يسهل كل شئ

اه بتكب الرقم اللي قولنا عليه في الاول لما بتمضي قصاد اسمك في الكشف . الرقم ده بتكتبه علي ورق الاجابه وبتكتب بياناتك اللي هي
اسمك ورقم تليفونك والمحافظة بتاعتك والمكان اللي بتمتحن ليه اللي هو بنك فيصل

بعد ما تخلص التلات امتحانات بتيجي وبتاخد الورق كله منك وبتقعد في نفسك مكانك لانك هتعمل الانترفيو

بيبداوا بالترتيب اللي موجود في الكشف علي حسب رقمك بردوا

بياخدو ا 3 اسماء وبيدخلوا الانتر فيو مع بعض بيقعدوا حوالي 6 دقائق او 10 دقائق بالكتير

ولما يخرجوا بينادوا علي التلاتة التانين بالتريب اللي في الكشف

الانتر فيو عبارة عن ايه؟

بيقولك introduce your self in english please

خد بالك وانت بتعرف نفسك هو عايز يسمع منك انت عندك كام سنة وتقديرك ايه ؟ ونسبة تقديرك كام في الميه لازم تكون حافظها ؟ وموقف التجنيد بتاعك ؟ ولو مقولتش انت الحاجات ديه هو هيسالهالك وتكمل بقي تعريف نفسك عادي
وانت بتعرف نفسك هيسالك علي اخواتك ووظيفة الوالد يعني هيسالك عن عائلتك

بعد ما يسال كل واحد عرف نفسك ؟ يبدا يسال اسئلة تعرف ايه عن بنك فيصل الاسلامي؟
المفروض تكون محضر معلومات عن البنك وممكن تجيبها من اي حتة او الموقع بتاع البنك نفسه

ايه اكبر 3 بنوك في مصر؟ المفروض انت بترد عليه وتقوله من ناحية ايه ( اكبر فروع - اكبر عملاء - اكبر ايه بالظبط )؟وبعدين تجاوب ليه السؤال


ايه الفرق بين البنك التجاري والاسلامي؟
التجاري بيكون سعر العائد ثابت علي الودائع وسعر الفائدة ثابت علي القروض
اما الاسلامي سعر العائد متغير وتتعمل كافة المعاملات في البنوك الاسلامية طبقا لاحكام الشريعة الاسلامية


ايه هي منتجات البنك الاسلامي؟

البنك الاسلامي بيقبل الودائع زي المرابحة والمضاربة والتمويل بالمشاركة وبيع السلم

انت تعرف انه يوجد فرع لبنك فيصل في محافظتك ؟ مكانه فين؟

ديه الاسئلة اللي فاكرها

الاسلة ديه فيه منها عربي ومنها انجلش انت وحظك وكمان بيعتمد علي الناس اللي بتدخل معاك في الانتر فيو

يعني لو انتوا التلاتة كويسين في الانجلش المقابلة كلها هتكون انجلش لو معاكوا واحد بس تعبان في الانجلش هتكون شوية عربي وشوية انجلش وانت وشطارتك علشان تلفت نظر الراجل بتاع الاتش ار

هناك 5 تعليقات:

  1. ياريت تفيدنا ازاى اصلا اعلنم عن الوظيفة دى

    ردحذف
  2. ياريت تفيدنا ازاى اعلنم عن الوظيفة دى

    ردحذف
  3. هذه الوظيفة تم الاعلان عنها فى الاهرام

    ردحذف
  4. يعنى ممكن حد مش اتبعتلو ويروح ويمتحن ولا صعب

    ردحذف
    الردود
    1. ينفع امتحن بالدبلوم التجارة ولا لاء

      حذف