إزّاى تقتنص وظيفة أحلامك؟

1- إزّاي .. تقتنص وظيفة أحلامك؟
-------------------------------------

طبعاً مشكلة قلة فرص الشغل دلوقتى هى اكبر عائق بيواجه الشباب، لكن الغريب انك لما تشوف حال الشركات دى عن قرب هتلاحظ ان الشركات دى محتاجه ناس كتير فعلاً.. طب ياترى فين المشكلة؟

... المشكلة فى ان فجوة كبيرة بين متطلبات الشركات دى، ومؤهلات الشباب اللى لسه مش قد كده لأسباب كتيرة منها مثلاً ضعف التعليم فى كتير من الجامعات، وعدم استعداد الخريج صح للحياة المهنية بعد الجامعة، وكمان والمهم ان الشاب بيبقى مش عارف هو عاوز ايه ولا ايه امكانياته، و لا يقدر يستغلها ازاى.

اول خطوة صح قبل ما تدور على اى وظيفة وخلاص تضيع فيها عمرك وامكانياتك الحقيقية إنك تدور جوّه نفسك..

هات ورقة واقسمها نصين.. النص الاول فيه نقط قوتك والنص التانى فيه نقط ضعفك، لو لقيت صعوبة انك تعرف نقط قوتك ونقط ضعفك، هقولك على فكرة تعملها قبل جدول نقاط القوة والضعف.

هات ورقة تانية اكتب فيها كل حاجة عنك، كإنك بتحكى عنك فى قصة مثلاً، بتحب تعمل ايه فى وقت فراغك؟ ايه الوانك المفضلة؟ كنت بتحب تلعب ايه وانت صغير؟ ايه اكتر حاجة بتعملها وانت مرتاح ومفيش اى ضغط عليك؟ مين مثلك الاعلى؟ عاوز تبقى زىّ مين فى مجال الشغل؟ ايه المواقف اللى نجحت فيها فى حياتك؟ واياك تقلل او تنسى اى حاجة من انجازاتك اللى عملتها.. اى حاجة عملتها كويسة اكتبها.. كسبت فى ماتش مهم زمان .. بتعملى اكلة معينة بطريقة مميزة .. طلعت الاول فى مادة معينة فى المدرسة.. الخ..

لو حاولت تكتب كل حاجة عنك ومعرفتش، هات حد صاحبك او قريبك يعرفك كويس وخليه يحكى عنك، ايه اكتر مميزاتك واكبر عيوبك..

بعد الخطوة هتفتكر تانى انت مين وبتحب ايه وبتعرف تعمل ايه.. وفى نفس الوقت بتخاف من ايه وبتكره تعمله، وهو ده ببساطة تحليلك الداخلى.. نقط قوتك ونقط ضعفك.

اهم خطوة دلوقتى انك تتعرف على نفسك، وده عشان تتجنب حاجتين: انك تضيّع عمرك وحياتك فى حاجة مش بتحبها، وكمان لمّا هتشتغل فى حاجة هى نقطة قوة ليك هتقدر تتطور فيها بسرعة وتنمى نفسك وبالتالى هتنجز فيها وتنجح وسهل كمان انك تلفت نظر الشركات وتحصل على الوظيفة اسهل من الشباب المتخبط اللى مش عارف هو عاوز ايه..

يلا هات الورقة وقسمها وشوف ايه نقط قوتك ونقط ضعفك عشان نبدأ الخطوة التانية فى بحثك عن وظيفة احلامك..

----------------------------------
"دوّر برّه .. واكتب هدفك"

اول خطوة عشان تنجح فى اى حاجة فى حياتك إنك تحلل نفسك صح، وتشوف إنت مين، فين نقط قوتك عشان تنميها، وفين نقط ضعفك عشان تداريها أو تعالجها..
...
خلصت الخطوة دى؟؟ ابدأ شوف حواليك .. شوف الدنيا بره شكلها ايه

لمّا عملت التحليل الداخلى اللى كشف عن اهتماماتك و حبك لحاجات معينة، بقيت عارف إنك ميّال أكتر لوظايف معينة..

الخطوة الصح دلوقتى إنك تدور على الوظايف دى وتوصيفها، وتوصيف الوظيفة ده هو المهام والادوار اللى بتعملها فى وظيفة معينة.

زى ما قلنا ان خطوة التحليل الداخلى بتوفر عليك سنين من العمر اللى ممكن يضيع فى حاجة مش بتحبها، برضه تحليل البيئة اللى هتشتغل فيها، و الادوار اللى هتعملها فى الوظايف اللى عاوز تشتغل فيها برضه هيوفر عليك سنين من الشغل فى حاجة ممكن كنت فاكرها كويسة او على مزاجك لكن هى مش كده..

يعنى مينفعش تشتغل فى الاتش ار او العلاقات العامة بدون ماتدرس كويس الوظايف المتاحة فى المجالات دى ..

توصيف الوظيفة ده سهل تعرفه لو كتبت فى جوجل او سألت عن job description لوظيفة معينة، و هيطلعلك نتايج كتير هتعرف منها الادوار والمهام الوظيفة اللى فى الوظيفة اللى بتدور عليها.

ده مش كفاية، إنت محتاج تسأل ناس اشتغلوا فى الوظيفة دى، وكمان محتاج تتابع مواقع التوظيف وتشوف فيها الشركات بتوصف الوظيفة اللى عاوز تشتغل فيها ازاى؟ ايه المهام المطلوبة؟ وكمان ايه المرتبات المعروضة؟؟

خطوة التدوير فى مواقع التوظيف والمعارض عن توصيف الوظايف ميزتها إنها بتديك انطباع عملى جداً عن واقع الوظايف دى، لان توصيف الوظيفة على الورق حاجة والشغل العملى فى الشركات المصرية حاجة تانية..

خطوة التدوير والبجث فى الادوار والمهام للوظيفة اللى بتحلم بيها، بالتفصيل، هى خطوة متقلش أهمية عن خطوة فهم نفسك، لإن فى ناس بتشوف الوظايف من بره وتتدبس فيها لمّا تدخلها، طبعا ده غير إن ببحثك ده هتعرف هى الوظيفة دى مطلوبة قد ايه بالمقارنة بباقى الوظايف..

خلصت خطوة التحليل النفسى لنقاط القوة والضعف فيك؟ ومعاه تحليل للبيئة اللى هتشتغل فيها والادوار والمهام المطلوبة عملياً لوظيفة احلامك؟ جمّع بقى كل المعلومات اللى جمعتها واكتب بالظبط فى ورقة جملة بتحدد هدفك بدقة..

مثلاً .. بعد ما عرفت اهتماماتك كويس ولقيت انك مبتملّش من البحث باستمرار، صبور على التفاصيل، بتميل لتقييم الأمور وتحليلها، وكانت ليك انجازات فى المدرسة والجامعة لما كنت احسن واحد بتعمل ابحاث، وكنت بتساعد زملائك فيها، بما يدل انك ميّال مثلا لمجال البحوث التسويقية..

وبعد ما حللت نفسك انك لسه مبتدئ فى التسويق، ومعندكش خبرة كبيرة فيه، لكن متفوق وعندك انشطة متميزة، وحضرت كورسات فى التسويق..

وبعد ماعرفت ان وظيفة محلل سوق – Market analyst، هى انك بتصمم ادوات البحوث سواء استقصاءات او طرق ملاحظة وتجريب، وبتحلل البيانات الموجودة وبتخرج بمعلومات عن البيئة التسويقية..

هتكتب مثلاً: عاوز وظيفة محلل سوق فى شركة مبتدأة موجودة فى مدينة كبيرة وبتشتغل فى مجال تكنولوجيا المعلومات..

بالدقة دى يبقى انت كده شغال شغل علمى وبتختصر على نفسك وقت وجهد كبير ممكن كانوا يضيعوا فى سكة عشوائية بيمشى فيها اغلب الناس اللى مش فاهمين نفسهم ولا فاهمين عاوزين ايه، ولا عارفين ايه ظروف السوق والدنيا برّه..

بعد ما تخلص الخطوة دى هنتكلم المرة الجاية ان شاء الله عن "فين هى الوظايف وتجيبها ازاى؟؟"

---------------------------------------
(التدوير على الوظيفة - العلاقات العامة)

بعد ما خلصت مرحلة البحث عن نقط قوتك وضعفك، و حطيت ايدك على الفرص الموجودة والتهديدات فى السوق عن طريق تدويرك على توصيف الوظيفة، وظروف الوظايف المختلفة وعرفت انهى مطلوب اكتر وانهى ملكش فرصة كبيرة فيه، وبعد ما استقريت على هدف محدد، زى ما شفت كده فى المرة اللى فاتت، جه الدور دلوقتى على ...التدوير..

نبدأ مع اول واهم خطوة عشان تلاقى وظايف التسويق، والخطوة دى ببساطة هى العلاقات العامة.

لما عملنا استبيان لقينا ان اغلب الناس اللى لقوا وظايف كان عن طريق العلاقات العامة، وده مش غريب، فحاول تلاحظ حواليك إن اغلب صحابك وزمايلك فى الشغل اقتنصوا الوظايف فى طريقهم عن طريق حد يعرفوه.

الموضوع ده اسمه Referrals وهو اسلوب توصية بتستخدمه أكبر الشركات فى العالم، وعن طريقه بتجيب ناس متميزة ليها سمعة وسط الناس كويسة، وبتمشى الشركات دى بمنطق اللى نعرفه احسن من اللى منعرفوش، وبالمنطق ده بيقولوا ان اللى بيجي عن طريق المعارف هما ناس موثوق فيهم وفى شغلهم، ده غير واحد لسه ميعرفوش حاجة عنه وهيبدأوا يتعرفوا عليه من أول وجديد.

الاسلوب ده بالمناسبة بيوفر كتير جداً على الشركات سواء وقت او جهد، لإن الشركة اللى تقدر تجيب الناس المتميزة عن طريق المعارف هتوفر إعلان فى جورنان أو فى موقع توظيف، وهتوفر سلسلة طويلة ومجهدة من الانترفيوهات مع ناس كتير عشان يختاروا فى الاخر واحد فى مكان معين.

طريقة التوصية دى ملهاش علاقة بطريقة الواسطة، اللى بتخلى ناس مش كفاءة بتدخل اماكن هى متستحقهاش على حساب ناس اكتر كفاءة، وطريقة الواسطة دى بتنفع فى المصالح الحكومية اللى على قدها، وكان بتمشى زمان فى الشركات الخاصة لما الاب يشغل العيلة كلها وعيلة صاحبه، وكانت الدنيا بتمشى كده، لكن مع المنافسة القوية ودخول فكرة مساهمى الشركات بقوة للسوق بقى كل هم الشركة انها تجيب ارباح وفلوس من تحت الارض، ولا عزاء للمجاملات او الواسطة اللى هتخربلهم الشركة وتفلسها.

دلوقتى دورك انك تنزل المجتمعات المتميزة وتتعرف على ناس ناجحة وتخليهم صحابك وزمايلك لان دول اللى هيفتحولك طرق للشغل، انزل كمان لمحاضرين معروفين و متخصصين فى المجالات اللى عاوز تركز فيها، وابدأ شد معاهم حوارات واتعرف عليهم واستشيرهم باستمرار وبرضه هيساعدوك كتير جداً.

حاول من النهاردة تطبق خطوة العلاقات العامة دى والمرة الجاية هنتكلم عن خطوة جديدة وطريقة جديدة فى طريقك لاقتناص وظيفة احلامك..

---------------------------------

اتفقنا قبل كده ان فى نوعية وهى الاكتر من الناس بتشتغل فى اى حاجة تقابلها، وبتقبل بأى مرتب يتعرض عليها، وتعيش حياة عادية جدا ويمكن اقل من العادية.. ده لأن الناس دول مكلفوش نفسهم يقعدوا يخططوا لحياتهم و ازاى يقتنصوا وظيفة احلامهم.. فاشتغلوا فى اماكن مش عايزنها وممكن تكون أقل بكتير جداً من امكانياتهم..

... أما النوعية الناجحة والسعيدة فى شغلها هى اللى خططت لطريقها صح، وعملت زى ما اتفقنا نوعين من البحث: بحث داخلى عن نقاط قوتها عشان تشتغل عليها وتتطورها وتستغلها، و نقط ضعفها عشان تبعد عنها او تصلحها، ونوع تانى من البحث وهو البحث الخارجى عن التهديدات اللى فى السوق (ظروف اقتصادية وحشة - قلة فى الوظايف فى مجالات معينة - ظهور تقنيات جديدة بتخلى الشركات تستغنى عن مجالات قديمة)والفرص (فى وظايف متاحة فى اماكن معينة - شركات كتير بتفتح وكلها بتدور على موظفين فى مجال معين و.. هكذا)..

شفنا كمان ازاى تشوف توصيف الوظيفة - Job description اللى عاوز تشتغل فيها، وده عشان متتدبسش فى حاجة مش حاببها، أو مش مناسبة لامكانياتك، وكمان عشان تعرف جو المجال ده قبل ما تدخله...

بعدين دخلنا فى منطقة العلاقات العامة وقولنا ان اشهر وسيلة عشان تروح بسرعة لوظيفة احلامك يكون عندك علاقات كويسة فى المجال اللى انت عاوزه، لان الشركات غالبا بتفضّل تاخد ناس يكونو معرفة - Referrals وده بالنسبة لها احسن و اوفر من الاعلانات والانترفيوهات الرسمية.

النهاردة عاوزين نتكلم عن طريقة تانية من طرق التدوير على الوظيفة وهى طريقة أدلة الأعمال - Business directories، ودى الادلة اللى بتجمع عناوين و ارقام وبيانات الاتصال للشركات فى كل المجالات، والادلة دى كتير اوى و اشهرها على الاطلاق حالياً موقع يلو بيدجز - Yellowpages.com.eg.

انت هتدخل الدليل ده تدور على اى شركة نفسك تشتغل فيها، هتلاقى الشركة معاها رقم تلفون ارضى وموبايل و الميل بتاعها، تقدر تستخدم الارقام والميلات دى عشان توصل لحد صاحب قرار هناك او على الاقل قسم الموارد البشرية - HR

متستهونش بالطريقة دى خالص لان الشركات دايما بتكون محتاجة ناس فى كل التخصصات، وحتى لو مش محتاجة دلوقتى ممكن تحتاج بكرة عشان كده ايميلك او مكالمتك ليهم مش هتخسّر ابداً..

الشركات دى بتدفع فلوس كتير عشان تجيب سى فيهات قوية للشباب سواء من شركات التوظيف والاستشارات او مواقع التوظيف ، و انت بدورك بتبعتلهم سى في مجانى، فأكيد هيرحبو بيه، خصوصا طبعا لو انت دارس نفسك ودارس السوق والشركات كويس، فأكيد هتستهدف الشركة الصح فى الوقت الصح بناء على البيانات اللى جمعتها قبل كده.

يستحسن زى ما قلت وبأكد انك تبعت للشركة الصح والمناسبة لإمكانياتك الحالية وفى الوقت الصح، عشان فرص نجاحك مع الشركة دى تزيد.

كلمت الشركة هتلاقى حد (اى حد) بيرد عليك، حاول توصل معاه لقسم الاتش ار، وقوله انك كنت حابب الشركة وشغلها وانك عندك امكانيات او خبرات ممكن تفيد الشركة دى، هيبقى ساعتها قدامك سيناريوهات كتير زى ان الحد ده او الحدّة يحولك للاتش ار، او يوديك لصاحب قرار، او يديك ميل تبعت عليه السى فى، وغالبا هيكون قسم الاتش ار، وممكن برضه واحد رخم يقولك شكرا مش عاوزين النهاردة.. عااااااادى جداً .. لازم تبقى بطل وتستمر فى المحاولات .. لان دى وظيفة احلامك مش حاجة عادية ..