الاثنين، 11 يوليو، 2011

رسالة لخريجى كلية الحقوق

هنبدء نتناول كلية كلية ونقترح وظائف لخريجي كل كلية

وهنبدء بخريجى كلية الحقوق ( لية حقوق لانها كلية خريجينها كتير واية تانى لان اى شركة بتشغل واحد او اتنين شئون قانونية وتعين قصادهم 20 محاسب و 20 ادارى ولو كانت هندسية 20 مهندس الارقام نسبة وتناسب متناسبة مع حجم الشركة )

هتقولولى واية الهدف هقولكم لان خريجى الكليات معندهمش وعى ولا ثقافة بسوق العمل كل واحد مستنى اعلان يطلب خريجى كلية كذا معلش طولت عليكم بالمقدمة الطويلة دى

1-محامى فى مكتب محاماة وسهل تدور على دليل المحامين وتتصل بيهم وتعرض نفسك عليهم مش عيب ولا حرام

2-شئون قانونية فى شركات بترول و بنوك لو حد يعرف يوصلها ازاى من غير واسطة يشوفلى شغل هناك معاة هسيب شغلى على طول

3- الموارد البشرية (HR ) واحد خريج حقوق مرة قالى واية علاقتنا بالموارد البشرية قولتلة الادارة دى خاصة بالتعيينات والتامينات والاتصال بمكاتب العمل ودة بينظمة حاجة اسمة قانون العمل قالى اة صحيح قلتلة حتى بالامارة بيدرسة فى حقوق القاهرة دكتور البرعى

4-ادارة المشتريات والعقود لية لان خريج حقوق الطبيعى احسن حد يقدر يصيغ عقود ويحط شروط جزائية وضمانات لشركتة بس تقرا عن المشتريات وتتعلم ازاى تدور على موردين

5-المبيعات والتسويق لانة متكلم جيد وعارف تطبيق القوانين ومش هفتى دى مهنة اى حد بس تعتمد على المهارة الشخصية اكتر من المؤهل ودة لاى مؤهل

6-العمل فى الهيئات الحكومية والوزارات و مجلس الدولة و مش عاوز اعقد حد تقريبا بردو وسائط بس الناس تعمل اللى عليها وتسعى ودة لاى مؤهل

7-خدمة العملاء والكول سنتر لان المحامى بطبيعتة لبق ودة لاى مؤهل

8-انك تتعلم حاجة فى الكومبيوتر وتتقنها وتمارسها وتشتغل بيها برمجة & جرافيكس& انشاء مواقع &شبكات ودة لاى مؤهل

ودة لاى خريج 9-تشتغل اعمال ادارية سكرتارية او مدير مكتب يعرف كومبيوتر ويتقن الاوفيس ويسلام لو معاك لغة تديك دعم تمام ودة لاى مؤهل

10- لو عندك هواية التدريس والالقاء تتعلم كورس وتتقنه وتشوف فيديوهات وتدى كورسات مجانية فى اى مكان تجرب فية وبعد كدة تشتغل ودة لاى مؤهل

11- تقرا فى ادارة المخازن وتشتغل فيها ودة لاى مؤهل

12-اعمال اخرى

هناك 22 تعليقًا:

  1. كلام نظرى .....عمليآ لا يتحقق

    ردحذف
  2. ههههههههه كلام نظرى بحت انا خريج حقوق وبشتغل فى مكتبه 400جنيه فى الشهر وصحبها بيحسسنى ان هو بيدينى 5000 جنيه مش 400 جنيه وانا من اسره بسيطه اوى ياريت ال يقدر يساعدنى الاقى شغل مناسب يكون مشكور وشكرا ليكم كلكم

    ردحذف
  3. محمود سلامة18 سبتمبر، 2011 3:10 م

    انا حاليا مش بشتغل لكن املى فى الله كبير ولنى هلقى شغل قريب يناسبنى والامل دة زاد لما اطلعت على هذا الموقع

    ردحذف
  4. يجماعه والله هو كلامه صح الى عاوز يشتغل فى مجاله يبقى يعينه ربنا لانها نك تشتغل عند محامى مش صعبه بس انه يديك فلوس تكفيك ده الى صعب اوى اوى على فكره انا كمان خريج حقوق وعرفت انه لازم اغير مجالى علشان اشتغل وانا دلوقتى باخد كورس شبكات وبنصح كل واحد عاوز يشتغل انه يدور على اى مهنه تانيه لان مهنتنا عاوزه صبر جبال ويشوف هو بيحيب ايه ويحاول ياخد فيه كورس وان شاء الله ربنا يكرمه ويارب انا كمان الاقى شغل بعد الكورس ده قولوا امين

    ردحذف
  5. يعني يبقي زميلك وكيل نيابة وتشتغل مندوب مبيعات

    ردحذف
    الردود
    1. اها اولا الشغل مش عيب وكمان هو ذاكر اكتر منك ف بتالى يستحق يبقا وكيل نيابه

      حذف
  6. طيب واللى خريج حقوق انجليزى أو فرنساوى يعمل ايه ؟؟؟!!!!

    ردحذف
  7. بلد الوسايط ومتقوليش لا بدليل انى مشتغلتش لحد دلوقت عشان معنديش واسطة وانا دفعه 2000

    ردحذف
  8. على فكرة انا خريجة حقوق بتقدير كمان وهموت على شغل حكومى فى مجالى بس انا لما بلاقى كل دا شباب خريج نفس الكلية عاطل بفقد الامل ياريت نلاقى شغل ويرزق مصر برئيس مصرى يخاف عليها

    ردحذف
  9. لنا الله

    ردحذف
  10. يا جماعة الصابر بالله خير


    ردحذف
  11. بعد التعب ده كله مفيييييييييييش شغل وان الواحد حب يتنيل يشتغل هياخد 300-400ج ودوووول ميكفوووش مصاريف طفل حسبنا الله ونعم الوكيل .

    ردحذف
  12. يااااارب يرزقنا كلنا بوظااايف كويسه
    ربنا كريم وقادر على كل شئ

    ردحذف
  13. الخير جاى للكل يااااااااااااااااااااااارب

    ردحذف
  14. وفى السماء رزقكم وما توعدون فورب السماء والارض انه لحق مثل ما انكم تنطقون .علشان كده انا مش خايف لو مشتغلتش

    ردحذف
  15. اخر سنه لي في حقوق انا منتظر اخد الشهاده وطيران علي اي بلد تاني

    ردحذف
  16. انا اول سنة فى الحقوق وخايف

    ردحذف
  17. حقوق اسم من غير جسم هى منظر بس مش اكتر مفيش حد شغال محامى كلة بيشتغل فى مجال تانى عندك مثلا مرتضى منصور دخل فى مجال الكورة والزمالك وواخد المحاماة اسم بس وسيط ليه عندك خالد ابو بكر محامى نقض وبيشتغل اعلامى المحامى مكن يشتغل اى حاجة مش فارقة هى اسم والله بس وسند لاهلة ولنفسة طبعا بس الواحد يحاول يتطلع عشان يحس انة استفاد من الكلية دى ومحدش يستهزأ به ويقولة انت شكلك ولا محامى ولا عارف اى حاجة ودة عيب لينا يا جماعة عشان الواحد مش حاسس بينا

    ردحذف
  18. بلا محاماة بلا نيلة محدش اصلا بيشتغل فى المحاماة غير الناس القديمة الى هما ابويا وابوك غير كدة البلد دى اصلا كلها بتاعت وسايط ومحسوبيات وقرف عندك مرتضى منصور دة كان قاضى فاشل وبعدين محامى فاشل وبقى ماسك الزمالك عادى المحاماة دى اسم من غير جسم احسن حاجة الواحد يفيد بيها اهلة ونفسة واصحابة غير كدة ميشتغلش بيها عشان متأكلش عيش حاف بس الاهم انة يكون على صلة بيها مهما كان مستواة عشان محدش يقولة انت فاشل ومش عارف حاجة فى المحاماة ودة هيبقى احساس وحش اوى

    ردحذف
  19. ي جماعه انا طالب حقوق بجامعه القاهرة سنة اولى بصراحه كدا انتو شايفين اني كلية الحقوق كويسه ليا يعني اكمل فيها ولا اشوفلي اي كلية تانية :(

    ردحذف