الاثنين، 25 أبريل، 2011

تتعامل ازاى؟؟؟؟ مع معارض التوظيف

ناس كتير بتسأل، أدور على شغل ازاي وأعمل إيه، وأروح فين، ويمكن اتكلمت عن الموضوع ده
كتير أوي الفترة اللي فاتت، النهارده أنا عايزة أتكلم عن موضوع مهم.
مهرجانات التوظيف.
الحقيقة في الفترة اللي فات تمن حوالي ٥ سنوات كده ابتدت تنتشر أوي فكرة إن الشركات تتجمع كلهم
في مكان واحدويعملوا مهرجان توظيف، أكتر مهرجانات أنا فعلا بحس إن مهم إني أحضرها،
وخاصة بتاع غرفة التجارة الامريكية ، لكن ده ما يمنعش إني باحضر برضه الباقي، لأنها بتكون فعلا
مفيدة جدا في حاجات كتير يمكن الناس ما تحسش بأهميتها.
طيب أهمية الموضوع ده إيه؟!
الحقيقة هي مفيدة لأكتر من فئة؛ يعني فئة اللي لسه متخرجين وبيدوروا على شغل، فئة اللي عايز
يغير مجاله، فئة اللي بيشتغل فعلا. نشوف بقى كل فئة في دول هتستفيد ازاي.
أولا : اللي لسه متخرجين جداد، المعارض دي بتساعدهم على حاجتين مهمين جدا:
أول حاجة إنهم يعرفوا احتياجات السوق إيه والشركات بتطلب إيه، وطبعا بكده يطورمن نفسه . ثاني حاجة إن يكون عندهم فرصة يحطوا السي في بتاعهم في أكثرمن مكان، وياخدوا بيانات شركات كتير
ويتعرفوا على مراكز التدريب والتطوير، يعني هيعرف حاجات كتيرة جدا.
ثانيا: فئة اللي عايز يغير مجاله، برضه هيبقى عنده فرصة هايلة إنه يقدم "السي في" في أكتر من
مكان، ويتعرف على الشركات دي، خاصة إن غالبا بيكون مسئول ال HR موجود، فطبعا أتعرف
وأعمل علاقات وأعرض خدماتي ...علاقات علاقات يعني.
ثالثا: فئة اللي بيشتغل فعلا، غالبا فيه ناس كتير بتبقى بتشتغل، وعاجبها شغلها، ومش عايزة تغيره،
طيب ما يروحش يعني ولا إيه؟ لا الحقيقة هو هيروح، بس هيروح علشان يتعرف على الشركات
التانية اللي بتشتغل في نفس المجال، يتعرف على إيه الجديد في السوق، ممكن يطلع بفكرة يطور بيها
شغله هو شخصيا، ويتعرف على ناس جديدة، يعني الهدف هيبقي علاقات عامة وتطوير نفسه. ده غير
إنه ممكن يتعرف على احتياجات الشركات إيه، يعني لو بيشتغل في المبيعات مثلا ممكن يفتح لنفسه
أسواق جديدة، ولو بيدرب ممكن يقدملهم خدمات تدريبية، أو على الأقل يتعرف على طلبات السوق
إيه.

طيب أعرف منين بقى أخبار المعارض دي؟ وأجيبها منين:
١. متابعة الجرايد والمجلات اللي بتهتم بالتوظيف.
٢. متابعة الإنترنت، يعني أعمل بحث كل مدة أخبار معارض التوظيف إيه وفين؟ومين عاملها؟
٣. الجامعات، الجمعيات الأهلية، النوادي، الجامعات الخاصة، كل دول بيعملوا معارض توظيف.
٤. متابعة كل الأماكن اللي فيها قاعات، قاعة المؤتمرات، دار الأوبرا ... إلخ.
أعمل إيه بقى علشان أروح:
١. كاتب سي في كويس.
٢. أعمل منها نسخ كتير لأن هناك بيكون تصوير النسخ غالي، يعني ٣٠ ل ٤٠ نسخة من السي في
بتاعي.
٣. أروح أعمل تسجيل برا الأول، وأكتب إني أحب يبعتوا لي لما يكون فيه معارض زي دي في المستقبل.
٤. أدخل ألف لفة، أدرس فيها الموقف، يعني أشوف كل الشركات وآخد فكرة عن الوظائف.
٥. بعدين أروح عند مكان مكان، أتعرف عليهم، أقدم السي في، أسألهم عن الأسئلة اللي نفسي فيها، أعرف
المعلومات، مين المسئول عن إيه؟
٦. بعد المعرض، أبعت للناس اللي اتعرفت عليهم، أشكرهم على وقتهم.

هناك 8 تعليقات:

  1. Gamed gdn, gzak allah 5airan :)

    ردحذف
  2. thanks for this advice

    ردحذف
  3. انا اول مرة اسمع عن الموضوع ده شكرا جزيلاlolllllll

    ردحذف
  4. الله يوفقك ويباركلك

    ردحذف
  5. جميل جدا

    ردحذف
  6. بجد مرسيي جداا .. انا كنت بسمع عن معارض التوظيف بس محضرتش ولا مرة ... جزاك الله خيرا

    ردحذف
  7. جزاك الله خيرا على مجهودك انا اول مرة اسمع عن معارض التوظيف

    ردحذف
  8. دة على اساس ان الراجل اللى بيحضر المعارض دى .....هو اللى الشركات محتاجاة ولو هو كدة مش محتاج يعمل كل دة لان هيبقى فى عروض كتير علية ....لكن اللى هيروح المعارض دى هيكتشف ان فى فجوة كبيرة جدا بينة وبين الشركات دى او انة فى حتة تانية خالص وكأنهم فى عالمين مختلفين ...حاسس انها دعاية للشركات بطريقة غير مباشرة ....لان الاحسن من المعارض ان دى تبقى شغلة الاتش ار تاخد الناس اللى تحس ان ممكن يجى منهم ولو بعد فترة ...ودة هيبقى فية فايدة من نحيتين ...الاولى ان التريننج هيبقى بأشراف الشركة نفسة بدل ما المتدريب يخبط يمين وشمال وميبقاش عارف وهو بيتدرب فمكان هل هو وصل للمستوى المطلوب ولا لا ...ثانيا :الشركة هتقدر تكتشف الشخص المتدرب دى من نواحى مختلفة ربما يتم توجيهة فى سكة تانية خالص او قدرات عندة وهو مش مكتشفها فنفسة لسة ...الحقيقة انا شايف المشكلة عند الاتنين الشركات والبيدوروا على وظائف

    ردحذف